Коррупцияга шектелип кармалган Транспорт жана жолдор министрлигинин статс-катчысы мамлекетке 2,5 миллион сом төлөп берди. Бул тууралуу Каржы полициясынын басма сөз кызматы билдирди.
Белгилей кетсек, 2021-жылдын 7-январында Транспорт министрлигине караштуу Бишкек-Ош унаа жолунун Мамлекеттик дирекциясындагы (ЖКДК) коррупция фактысы боюнча тергөө учурунда, министрликтин статс-катчысы Эрмек Мамыркалиев кармалган.
Экономикалык кылмыштарга каршы күрөшүү кызматы 2021-жылдын 9-январында Эрмек Мамыркалиев мамлекетке келтирилген зыяндын 2,5 миллион сомдук бөлүгүн өз ыктыяры менен төлөп бергенин маалымдады.
Ошол эле күнү Мамыркалиев Бишкек шаарынын Биринчи Май райондук соту тарабынан үй камагына чыгарылды
Бүгүнкү күндө аталган кылмыш иши боюнча Финпол тарабынан ар кандай рангдагы 30га жакын аткаминер кармалган. Алардын мамлекетке келтирген чыгымы 20 миллион сомду түзөрү айтылды. Ал арада, Финполдун берген маалыматына караганда, учурда чыгымдын дээрлик баары, 20 миллион сом, бюджетке кайтарылган.
