Борбор Азиядагы адам укуктары боюнча конгресстин координатору, мурдагы омбудсмен Турсунбек Акун: Жакында мен Москвага барып, президент Владимир Путиндин алдындагы Адам укуктары боюнча кеңештин төрагасы Валерий Фадеев менен жолугуп келдим, ал Кеңештин мүчөлөрү Александр Брод жана Кирилл Вышинский менен дагы пикир алмаштык. Талкууланган негизги маселе – 22-мартта Москвада болгон теракттан кийин Борбор Азиядан Орусияга барган эмгек мигранттарына болгон мамиле жана алардын жалпы эле абалы.
Москвада дагы, андан соң Санкт-Петербургга барганда да ал жакта жашаган кыргыз мигранттары менен жолугуп, алардын маселелерин талкууладык. Петербургдагы кыргыздар Чыңгыз Айтматовдун эстелигин тургуузу үчүн шаардын ичинде атайын жер тилке алып койгон экен, эми ал тууралуу мамлекет аралык чечим керек болууда. Фадеев менен – жай айларында Кыргызстанда, Ысык-Көлдүн жээгинде, эмгек мигранттарынын маселесин талкууга ала турган эл аралык форум өткөрүү тууралуу макулдаштык.
