Ош облусунун Алай районунда туугандары тарабынан сабалган наристенин окуясы иликтенет. Бул тууралуу Акыйкатчы Атыр Абдрахматова кабарлады.
«Алай райондук ички иштер бөлүмүнүн алдын ала маалыматы боюнча, баланы Алай аймактык ооруканасына туугандары алып келишкенде денесинде көгала тактар болгон. Ички иштер бөлүмдөрү өз иштерин жүргүзүп жатат. Акыйкатчы институтунун Ош облусу боюнча өкүлчүлүгү эртең ошол жерге барып, Акыйкатчынын ыйгарым укуктарынын алкагында иликтөө жүргүзүшөт», — деди Атыр Абдрахматова
Алай районундагы Сары-Могол айылында үч жашар наристени тууганы сабап салганын укук коргоочу Назгүл Турдубекова 27-июнда кабарлаган.
Ал Акыйкатчы институтунан окуя боюнча иликтөө жүргүзүп, укуктук баа берүүнү талап кылды.
«Баланын ата-энеси ажырашып, апасы Бишкекке иштегени кеткен. Бала тууганынын колунда калган. Алдын ала маалымат боюнча, баланы аёсуз сабап жүргөн, денесинде күйүк бар», — деди Турдубекова.
