УКМК «Нават» ресторанынын түптөөчүлөрүнүн бири С.Острецовдун камалышы тууралуу тараган маалыматка жооп берди. Бул тууралуу аталган мекеменин басма сөз кызматы билдирет.
Маалыматта берилгендей, ММКларда тарап жаткан маалымат чындыкка дал келбейт.
«УКМК тарабынан сотко чейинки өндүрүштүн алкагында, ломбарддардын түйүнүн жамынып алып, банк ишин мыйзамсыз жүргүзүү фактылары жана өзгөчө ири масштабда салык төлөөдөн баш тартуу фактылары 2009-жылдан азыркы учурга чейин иликтенүүдө. Ошондой эле, ломбарддардын түйүнү аркылуу кылмыштуу кирешелерди легалдаштыруу (адалдоо) фактыларын иликтөөгө байланышкан адамдардын тобу текшерилет, алар жөнүндө маалымат тергөө бүткөнгө чейин ачыкка чыгарылбайт», — деп берилет маалыматта.
Эске сала кетсек, буга чейин ММКларда «Нават» ресторанынын тең кожоюну С.Острецовду кысым көрсөтүү жана өзүнүн компанияларынын акцияларын тартып алуу максатында камакка алынгандыгы жөнүндө маалымат тараган.
