Ысык-Көл районуна караштуу Чолпон-Ата шаарында өзүн УКМКнын кызматкеримин деп тааныштырып, дарыканадан акча талап кылган Чүй облусунун тургуну кармалды. Бул тууралуу Ысык-Көл облустук милициясынын басма сөз кызматы маалымдады.
Маалыматка ылайык, 20-сентябрь күнү Чолпон-Ата шаарында жайгашкан дарыканага өзүн УКМК кызматынын ыкчам кызматкери катары тааныштырып, кызматтык күбөлүгүн көрсөтүп, ар кандай шылтоолор менен 5 миң сом акча талап кылып, алып кеткен. Ишкер бул боюнча Ысык-Көл РИИБине арыз менен кайрылат.
Жүргүзүлгөн ыкчам иш-аракеттердин негизинде Ысык-Көл РИИБдин КМК кызматкерлери тарабынан өзүн УКМКнын ыкчам кызматкери катары тааныштырып жүргөн 34 жаштагы Чүй облусунун жараны кармалып, Ысык-Көл РИИБдин убактылуу кармоочу жайына камакка алынды.
Ага кылмыш-жаза кодексинин 359-беренесинин (“Документтердин жасалмасы) негизинде сотко чейинки өндүрүш иши башталды.
“Жогоруда кармалган адамдан жабырлануучулар болсо 102ге, же (03943) 4-39-80, (0709) 331-515 номерлери аркылуу байланышсаңыздар болот”, — деп айтылат милициянын маалыматында.
