Министрлер кабинетинин төрагасы Улукбек Марипов Президенттин «Мамлекеттик жаңы кадр саясаты жөнүндө» жарлыгын ишке ашыруу алкагында дайындалган, ошондой эле ротациядан өткөн райондук мамлекеттик администрация башчылары – акимдер менен жумушчу кеңешме өткөрдү. Бул тууралуу маалыматты министрлер кабинетинин басма сөз кызматы маалымдады.
22-майда Президент мамлекеттик администрация башчыларын – облустардагы район акимдерин кызматтан бошотуу жана дайындоо тууралуу жарлыктарга кол койгон.
Марипов Кыргызстан эгемендүүлүк алгандан бери алгач ирет район акимдерин жана алардын орун басарларын аттестациялоо (ишин баалоо) өткөрүлгөнүн эскертти.
Ал белгилегендей, район акимдерин аттестациялоодон өткөрүү жана ротациялоо – мезгил талабы.
«Өлкөдөгү калктын 2/3 бөлүгү айыл жергесинде жашагандыгын эске алуу менен бул абдан маанилүү. Аймактардын жетекчилерин ротациялоо кадрлардын күчтүү резервин уюштуруунун аспабы болуп, келечекте алардын катарынан республикалык масштабдагы жетекчилер дайындалаарына ишеним билдирем», — деди министрлер кабинетинин башчысы.
