Венесуэланын Арагуа штатындагы сел жана жер көчкүдөн каза болгондордун саны 25ке жетип, дагы 52 тургун дайынсыз болууда. Бул тууралуу РИА Новости жазып чыкты.
Маалыматка ылайык, жекшембиге караган түнү бир айлык жаан сегиз сааттын ичинде жаап, сел каптаган. Кырсык болгон аймакта турак-жайлар жана соода ишканалары талкаланып, суу астында калып, электр энергиясы үзгүлтүккө учураган. Жабыркаган аймактардын жашоочулары убактылуу баш калкалоочу жайларга көчүрүлгөн.
Куткаруу иштерине армиянын 1200дөй кызматкери жана ар кайсы ведомстволордун куткаруучулары тартылган.
Президент Николас Мадуро мурдараак Арагуа штатындагы Лас-Тежериас коомчулугун табигый кырсык зонасы деп жарыялап, өлкөдө кырсыктын курмандыктарына үч күндүк аза күтүү жарыяланган.
“25 адамдын сөөгү табылды, алардын жакындарына көңүл айтабыз. Мындан тышкары 52 адам дайынсыз болууда», — деп өлкөнүн ички иштер, юстиция жана тынчтык министри Ремижо Себальос VTV каналынын эфиринде билдирген.
