Бишкек шаарынын ыктыярчылары жарандар үчүн акысыз транспорт уюштурушту. Бул тууралуу Демилгелүү жаштар борборунун төрагасы Аскар Алмаз уулу жергиликтүү маалымат булактарына билдирген.
Анын айтымында, алгач активисттер жарандарды Чүй проспектисине чейин гана жеткирүүнү пландашкан, бирок кийин шаардын айланасында бөлүнүүнү чечишкен.
«Бизде жети унаа бар, көп эмес албетте, бирок аракет кылып жатабыз. Бир чыкканда 30 кишинин жеткирүү мүмкүнчүлүгү бар. Маршрутниктер иш ташташканда эл аялдамаларга топтолуп, бушаймандык жаралды. Эгер коомдук транспорттун абалы туруксуз болсо, биз линияга чыгып иштөөгө даярбыз», — деди ал.
Эске салсак, өткөн жуманын башында маршруттук таксилердин айдоочулары жол кирени 15 сомго чейин көтөрүүнү суранышып, болбосо ишти таштайбыз деген талап коюшкан. Маршруттук таксилерде жүрүү тарифин көтөрүү маселесин кароо үчүн муниципалитетте жумушчу топ түзүлдү.
Кечээ эртең менен 500 кичи автобустун айдоочулары жумушка чыкпай коюшкан. Муниципалитет аларга карата чара көрөрүн убада кылды. Ал эми жол кире акысы май айынан тарта көтөрүлүшү мүмкүн.
