Ысык-Көл районунда туристтик сезонго даярдык көрүүнүн алкагында коомдук тамактануучу жайларда мониторинг жүргүзүлүп, алты жайда документтерге байланыштуу кемчиликтер аныкталды. Бул тууралуу Суу ресурстары жана айыл чарба министрлиги билдирди.
Маалыматка ылайык, Ветеринардык жана фитосанитардык көзөмөл кызматынын катынын жана Ысык-Көл райондук мамлекеттик администрациясынын тапшырмасынын негизинде 2026-жылкы жайкы туристтик мезгилге даярдык алкагында райондогу 22 коомдук тамактануучу жай текшерилди.
Текшерүүнүн жүрүшүндө ишканалардын коштомо документтери, эт жана сүт азыктарынын сапаты, ошондой эле алардын сакталуу шарттары каралды. Мониторингдин жыйынтыгында алты коомдук тамактануучу жайда тиешелүү коштомо документтер толук эмес экени аныкталды. Бул боюнча ишкана жетекчилерине түшүндүрүү иштери жүргүзүлүп, кемчиликтерди жоюу үчүн консультативдик жардам көрсөтүлдү.
Инспекторлордун айтымында, мындай алдын алуу иш-чаралары тамак-аш коопсуздугун камсыздоодо жана туристтерге көрсөтүлүүчү кызматтын сапатын жогорулатууда маанилүү роль ойнойт. Мониторинг иштери мындан ары да улантылып, аныкталган кемчиликтердин жоюлушу көзөмөлгө алынат.
