Социалдык тармактарда үрөй учурган окуянын видеосу тараган. Тасмадан жубайлар кепинделген кичинкей баланы көмүп жатканын көрүүгө болот.
Интернет колдонуучулары аталган жарандар өзбекстандык үй-бүлө экенин, учурда Орусияда жашап жатканын жазышууда.
Алардын өздүгү такталып, камакка алынганын Podrobno.uz сайты жазып чыкты. Бул ишти балдар акыйкатчысы көзөмөлгө алып, жагдайды иликтөө өтүнүчү менен укук коргоо органдарына кайрылган.
Андан соң, окуя дыкат иликтенип, аял 28 жаштагы Анжиян облусунун Жалалкудук районунун тургуну болуп чыккан. Ал, 2016-жылдан бери жолдошу менен Новосибирск шаарында жашап келген. Видеодогу наристе алардын 2019-жылы туулган кызы экени аныкталган.
Новосибирск шаары боюнча тергөө бөлүмү никедеги жубайларга Орусиянын Кылмыш-жаза кодексинин 117-беренеси (кыйноо) боюнча кылмыш ишин козгоду. Учурда тергөө амалдары жүрүүдө.
