Өзгөн районунда өзгөчө кырдаал жарыяланып, тургундар коопсуз жайга толугу менен көчүрүлдү. Бул тууралуу ӨКМден билдиришти.
Кечээ, 22-март күнү Өзгөн районундагы Карл Маркс айылынын Кызыл-Күңгөй тилкесинде жер кыртышы активдешип, болжол менен 1млн куб жер көчкү түшкөн. Аталган тилкеде 18 турак үйгө коркунуч пайда болуп, үйлөргө 300 метр аралыкта жетпей калган. Буга байланыштуу үйдүн 195 тургуну үй тиричилик буюмдары менен Куршаб айылына туугандарына көчүрүлгөн.
Жеринде жергиликтүү бийлик тарабынан көчкүнү көзөмөлдөөгө нөөмөт уюштурулган. Жер көчкү акырындан жылып, учурда турак үйлөргө 120 метр калды. Акимдин буйругу менен Карл-Маркс айылына I даражадагы табигый мүнөздөгү өзгөчө кырдаал жарыяланды.