Жогорку Кеңештин мурдагы депутаты Токтогул Туманов каза болду. Бул тууралуу Республикалык клиникалык жугуштуу оорулар ооруканасынын башкы дарыгери Гүлжигит Аалиев жергиликтүү басылмаларга тастыктаган.
Маалыматка ылайык, Туманов кечээ, 6-апрелде көз жумган.
Аалиевдин айтымында, Туманов үйүндө дарыланып жаткан жана абалы начарлаганда 1-апрелде ооруканага жаткырылган. Бейтап пневмонияга чалдыккан. Ооруканага келгенде абалы оор болчу.
Маркум 2018-жылы октябрь айында Өкмөткө караштуу Мамлекеттик мүлктү башкаруу фондунун төрагасынын орун басары кызматына дайындалган.
2010-жылы 10-ноябрда Жогорку Кеңештин V чакырылышынын депутаты болуп шайланган.
