Жумгал районунда мыйзамсыз түрдө жеке менчикке берилген жер тилкеси мамлекетке кайтарылды. Бул тууралуу Башкы прокуратура билдирди.
Маалыматка ылайык, райондук прокуратура тарабынан жер мыйзамдарынын сакталышы боюнча жүргүзүлгөн текшерүүнүн жүрүшүндө 2020-жылы Чаек айыл аймагындагы калктуу конушта жайгашкан 0,21 гектар жер тилкеси мыйзамсыз түрдө жеке менчикке берилгени аныкталган.
Прокурордук чаралардын натыйжасында баасы 10 миллион 830 миң сом деп бааланган жер тилкеси муниципалдык менчикке кайтарылды.
Башкы прокуратура мыйзамсыз менчиктештирилген мамлекеттик жана муниципалдык мүлктөрдү кайтаруу боюнча иштер улантылып жатканын билдирди.
