Кыргызстанда айрым пластик калдыктарын жана полиэтилен баштыктардын жүгүртүүсүн чектөө иштери этап-этабы менен жүргүзүлүүдө. Бул тууралуу Жаратылыш ресурстары, экология жана техникалык көзөмөл министрлиги билдирди.
Маалым болгондой, 2023-жылдан тарта Ысык-Көл облусунда жана өзгөчө корголуучу аймактарда мындай чектөөлөр киргизилген. Ал эми 2027-жылдан баштап полиэтилен баштыктарды өндүрүүгө жана сатууга толук тыюу салуу пландалууда.
Кыргызстанда мамлекеттик саясаттын алкагында пластик калдыктарын азайтуу жана айлана-чөйрөнү коргоо максатында полимердик пленкалардын жүгүртүлүшүн чектөө иштери этап-этабы менен ишке ашырылууда.
Адистердин эскертүүсүнө ылайык, пластик калдыктары жаратылышта 400дөн 700 жылга чейин, ал эми кадимки полиэтилен баштыктар 100дөн 200 жылга чейин чирибей турат.
«Алар микро- жана нано-бөлүкчөлөр түрүндө тамак-аш, суу жана аба аркылуу адамдын организмине кирип, ден соолукка олуттуу коркунуч жаратууда», — деп айтылат маалыматта.
