Кочкордо сапатсыз курулган мектепти колдонууга кабыл алган кызмат адамдарына карата кылмыш иши козголду. Бул тууралуу Башкы прокуратурадан билдирди.
Текшерүүдө, Нарын облустук капиталдык курулуш башкармалыгынын жооптуу кызмат адамдары кызмат абалынан кыянаттык менен пайдаланып, Кочкор районунун Ара-Көл айылындагы мектептин курулуш иштери сапатсыз жүргүзүлгөндүгүнө карабастан, аткарылган жумуштардын актыларын кабыл алышкандыгы аныкталган.
Мындан тышкары, пианино, муздаткыч, тигүү машиналары өңдүү керектүү жабдыктар жана эмеректер жок болгондугуна карабастан формалдуу түрдө жалган актыларды түзүү менен акча каражаттарын мыйзамсыз негизде куруучу ишканага которуп беришкен. Мамлекетке 4 млн 626 миң сомдук зыян келтирилген.
Бул факты боюнча «кызмат абалынан кыянаттык менен пайдалануу» беренеси менен кылмыш иши козголду.
