Чет өлкөлүк жумушчуларды мыйзамсыз иштетип, тигүү цехин уюштурган жаран кармалды. Бул тууралуу УКМК билдирет.
20-июнга караган түнү Сокулук районунун Новопавловка айылында жайгашкан цехте тинтүү иштери жүргүзүлдү. Анда Түштүк Азиядагы өлкөлөрдөн келген 30 жаран эмгектенип жатканы такталды.
Аталган жарандарды Ж.А. алдамчылык жол менен ишке алып, убада кылынган эмгек акысын берген эмес. Ал жергиликтүү милиция кызматкерлери менен ич ара сүйлөшүп, чет өлкөлүк жарандардын паспортторун тартып алган. Аларды Кыргызстандын аймагында мыйзамсыз жүргөндүгү үчүн каматам деп коркутуп турган. Жумуш орундары жана жашоо шарттары санитардык талаптарга жооп бербейт. Толук тамактануу дээрлик камсыз кылынган эмес.
Ж.А. жана райондук милиция кызматкери А.А. убактылуу кармоочу жайына камакка алынды. Тиешелүү тергөө иштери жүрүп жатат.
