Грециянын Афина шаарында өтүп жаткан (U-17) дүйнө чемпионатында эки кыргыз балбаны күмүш медаль тагынды.
Дене тарбия жана спорт мамлекеттик агенттигинен билдиришкендей, грек-рим күрөшү боюнча 60 кг салмактык категорияда килемге чыккан Амангелди Ысакбаев Армения, Мексика, Германиялык балбандарды жеңип, финалда Азербайжандын спортчусуна жеңилип күмүш медалга ээ болду.
Ал эми 45 кг салмак категориясында күч сынашкан Нуркерим Кумарбеков Түркия, Украина жана Азербайжандын спортчуларын жеңип чыгып, финалда Казакстандын балбанына 7:8 эсебинде аз айырма менен утулуп, 2-орунду ээледи.
