Кыргызстанда облус жана райондордун ордуна 20дан ашык аймак түзүү пландалып жатат. Жаңы административдик аймактар райондон чоң, бирок облустан кичине болот. Бул тууралуу Мамлекеттик кызмат жана жергиликтүү өз алдынча башкаруу иштери боюнча агенттиктин директору Элчибек Жантаев «Кабарга» берген маегинде билдирди.
Анын айтымында, аймактардын чек аралары экономикалык мүмкүнчүлүктөрүнө жана өзгөчөлүктөрүнө жараша аныкталат. Реформа бири-бирин кайталаган башкаруу органдарын жоюуга багытталган.
Жантаев мисал катары Ысык-Көл облусунун түндүк жана түштүк бөлүктөрүн өз-өзүнчө кароо, ал эми Ош жана Жалал-Абад облустарындагы чакан райондорду ирилештирүү мүмкүнчүлүгүн атады.
