Ош шаарында Осмонов көчөсүнүн үстүнөн өтүп, Айтиев жана Көкүм бий көчөлөрүн бириктирген эки деңгээлдүү эстакадалык көпүрөнүн курулушу жүрүп жатат. Бул тууралуу мэриядан билдирди.
Маалыматта Осмонов көчөсүн Барсбек кагандын эстелиги жайгашкан айлампадан тарта Касымбеков көчөсүнө чейин кеңейтүү каралганы белгиленген. Эки тилкелүү трасса алты тилкеге чейин кеңеет.
Ал эми айлампадагы Барсбектин эстелигин Касымбеков жана Раззаков көчөлөрүнүн кесилишине которуу маселеси каралууда. Мэр Жеңишбек Токторбаев аталган кесилиштеги май куюучу жай алынып, ордуна Барсбек атындагы сквер курулуп, эстелик ошол жерге коюла турганын билдирди.
