Үрүмчү шаарында жер титирөөгө туруктуу курулуш жана инженердик долбоорлоо мамлекеттик институтунун директору Канат Канболотов баштаган делегация Синьцзян Курулуш илим изилдөө институту менен кызматташуу боюнча меморандумга кол койду. Бул тууралуу Курулуш министрлиги билдирди.
Маалым болгондой, курулуш тармагындагы тажрыйба алмашуу, инвестициялык кызматташтык жана Кыргызстандагы инфраструктуралык долбоорлорго кытайлык өнөктөштөрдү тартуу маселелери талкууланды.
Меморандум заманбап технологияларды киргизүү, биргелешкен долбоорлорду ишке ашыруу жана эки тараптуу өнөктөштүктү бекемдөөгө багытталган. Делегация ошондой эле Синьцзяндагы нөлдүк энергия керектөөчү имарат жана илимий-өндүрүштүк лабораториялык комплекс менен таанышты.
