Министрлер кабинетинин төрагасы Адылбек Касымалиев Улуттук онкология жана гематология борборунун поликлиникасын күтүүсүз текшерди. Өкмөттүн басма сөз кызматынын маалыматында, текшерүү бейтаптардан түшкөн арыздардын негизинде уюштурулган.
Төрага борбордун бейтаптарды кабыл алуу шарттары, кызматкерлердин иши, жабдуулардын абалы жана мекеменин инфраструктурасын текшерген. Анын жүрүшүндө медициналык тейлөөнү уюштуруу жана ички иштерди координациялоо боюнча кемчиликтер аныкталган. Касымалиев узун кезектер жана иштин жетишсиз уюштурулушу боюнча жооптуу жетекчилердин ишин сынга алды.
Инспекциянын жыйынтыгында Саламаттык сактоо министрлигине жана мекеме жетекчилигине төмөнкү тапшырмалар берилген:
- башкаруу тутумунун натыйжалуулугун камсыз кылуу;
- медициналык жабдууларды ыкчам тартипте сатып алуу;
- кызматкерлердин штатын көбөйтүү;
- бейтаптарды кабыл алуу үчүн кошумча жайларды түзүү.
