Суу ресурстары, айыл чарба жана кайра иштетүү өнөр жайы министрлиги АБанк жана Элдик Банк менен биргеликте жеңилдетилген насыя алуу үчүн электрондук кезек системасын ишке киргизерин билдирди.
Маалым болгондой, ушул жылдын 1-июнунан тартып банктарда арыздарды кол менен кабыл алуу жана кезекке каттоо токтотулат. Эми бардык арыздар “iDyikan” санариптик платформасы аркылуу онлайн кабыл алынат.
Жаңы система аркылуу дыйкандар:
• онлайн каттоодон өтө алышат;
• жеңилдетилген насыяга арыз бере алышат;
• аралыктан кезекке тура алышат;
• арыздын абалын реалдуу убакытта көзөмөлдөй алышат.
Министрлик бул система мамлекеттик каражаттарды бөлүштүрүүдөгү ачыктыкты жана ыңгайлуулукту күчөтөрүн белгиледи.
Ошондой эле келечекте “iDyikan” мобилдик тиркемесин ишке киргизүү пландалууда.
