31-май күнү Ош шаарындагы Ак-Буура дарыясына түшүп кеткен 2017-жылы туулган баланын жансыз денеси Өзбекстандын аймагынан табылды. Бул тууралуу Өзгөчө кырдаалдар министрлигинин Ош шаары боюнча башкармалыгы билдирди.
ӨКМдин маалыматына ылайык, баланы издөө иштерине жалпысынан 128 адам, анын ичинде куткаруучулар, милиция кызматкерлери, туугандары жана дрон тартылган.
Издөө-куткаруу иштеринин жыйынтыгында баланын сөөгү Ак-Буура дарыясынын Өзбекстандагы бөлүгүнөн табылган. Учурда маркумдун сөөгүн Кыргызстанга алып келүү боюнча тиешелүү иштер жүргүзүлүүдө. Ата-энеси Өзбекстандын аймагына жөнөп кетишти.
