Бишкек шаарында 2026-жылдын 1-июлунан тартып жеңилдетилген дары-дармектерди берүү системасы өзгөрөт. Бул тууралуу Милдеттүү медициналык камсыздандыруу фондунан билдиришти.
Маалыматка ылайык, Мамлекеттик кепилдиктер программасы жана Кошумча милдеттүү медициналык камсыздандыруу программасы боюнча каралган жеңилдетилген дары-дармектер эми «Кыргызфармация» мамлекеттик ишканасынын «Эл Аман» дарыкана тармактары аркылуу гана берилет.
Бул пилоттук долбоор 2026-жылдын 31-декабрына чейин ишке ашырылат. Камсыздандырылган жарандар электрондук рецепттин негизинде дары-дармектерди 50 пайызга чейин арзандатуу менен сатып ала алышат. Ал эми бронх астмасы, параноиддик шизофрения, ар кандай аффективдүү бузулуулар, эпилепсия жана онкологиялык оорулардын терминалдык стадиясы менен жабыркаган бейтаптар үчүн дары-дармектер 90 пайыздык арзандатуу менен берилет.
Жеңилдетилген тартипте берилүүчү дары-дармектердин толук тизмеси үй-бүлөлүк дарыгерлерде жана Милдеттүү медициналык камсыздандыруу фондунун расмий маалымат булактарында жеткиликтүү.
