Колумбиянын Букараманга шаарында өткөн 56-эл аралык физика олимпиадасында (IPhO 2026) Кыргызстандын улуттук курама командасы тарыхый ийгиликке жетишти. Бул тууралуу Агартуу министрлиги билдирди.
Мелдешке катышкан кыргызстандык бардык беш окуучу тең байгелүү орундарга ээ болуп, өлкөнүн тарыхындагы эң ийгиликтүү көрсөткүчтөрдүн бирин жаратты.
Жеңүүчүлөр:
- Темирхан Салиев («Газпром Кыргызстан» мектеби) – күмүш медаль;
- Аскар Абдиев (AIMS Razzakov) – коло медаль;
- Айтегин Эмилбеков («Газпром Кыргызстан» мектеби) – коло медаль;
- Ахмед Абылаев («Сейтек-СТЕМ») – коло медаль;
- Нурбол Мырзабеков («Маариф») – Ардак грамота.
Министрликтин маалыматына ылайык, Темирхан Салиевдин күмүш медалы Кыргызстан үчүн акыркы 19 жылдагы алгачкы күмүш байге болду. Буга чейин мындай жыйынтык акыркы жолу 2007-жылы катталган.
Жыйынтыгында Кыргызстандын физика боюнча эл аралык олимпиадалардагы байге куржуну 3 күмүш, 17 коло медаль жана 27 ардак грамотага жетти.
