Кыргызстанда 20 миңге жакын адамды, анын ичинде маданият тармагынын кызматкерлерин мамлекеттик ипотека аркылуу турак жай менен камсыздоо пландалууда.
Бул тууралуу маданият, маалымат жана жаштар саясаты министри Мирбек Мамбеталиев «Ачык кабинет» долбоорунун алкагында билдирди.
Анын айтымында, батирлер Мамлекеттик ипотекалык компания аркылуу берилип, алгачкы үйлөрдү ушул жылдын сентябрь–октябрь айларында пайдаланууга берүү мерчемделген.
Министр турак жай маселеси маданият тармагында эмгектенген кызматкерлер үчүн эң маанилүү социалдык маселелердин бири экенин белгилеп, бул багыттагы иштер улантыларын кошумчалады.
