Жалпы билим берүүнүн мамлекеттик стандартына ылайык, башталгыч класстардын окуучуларынын билим жетишкендиктерин баалоо тартиби өзгөрүүсүз сакталат. Бул тууралуу Агартуу министрлиги билдирди.
Министрликтин маалыматына ылайык, 1-класстан 3-класска чейинки окуучуларга мурдагыдай эле сандык баа коюлбайт. Алардын жетишкендиктери сапаттык жана сыпаттык баалоо ыкмасы аркылуу аныкталат.
Ал эми 4-класстан тартып окуучулардын билимин баалоодо белгилер коюу системасы колдонулат.
Агартуу министрлиги белгилегендей, мындай ыкма башталгыч класстын окуучуларынын мектептеги окуу процессине жеңил ыңгайлашуусуна шарт түзүп, алардын жетишкендиктерин кеңири жана ар тараптуу баалоого мүмкүнчүлүк берет.
