Кече 11-апрель күнү, кечки саат 18:00 чамасында Баткен шаарында Тажикстанга бараткан жүк ташыган 3 фура жергиликтүү тургундар тарабынан токтотулган. Абалды көзөмөлдөөгө келген күч түзүмдөрү, жергиликтүү тургундарга орой мамиле кылып, сөгүнүүгө чейин барган.
Анын бул аракети тасмага тартылып, интернетке таркап кеткен.
Баткен ОИИБнин басма сөз кызматы аталган окуяда элге орой мамиле кылып, милициянын беделине терс пикир жараткан кызматкерлердин үстүнөн кызматтык иликтөө башталганын кабарлайт.
«3 таджик жарандарынын оор жүк ташуучу унаасы келип, эл тарабынан токтотулуп, ызы-чуу салганда ИИОнун айрым бир кызматкерлери тарабынан одоно мамиле жасалып, ошол жерде турган жергиликтүү тургундар менен сөгүшүп жаткан видеолору коомчукка соцтармактарда таркап, милициянын беделине терс пикирлер жазылды.
ИИОнун кызматкерлеринин жүрүм-турум нормаларына туура келбеген жагдайларды жараткандыгы үчүн, ички иликтөө кызматы тарабынан кызматтык териштирүүлөр башталды. Кызматтык териштирүүлөрдүн жыйынтыгында бул кызматкерлерге тартиптик чаралар колдонулат» -дейт Баткен ОИИБнин басма сөз катчысы Дамира Юсупова.
Ошондой эле Баткен ОИИБи жергиликтүү тургундар тарабынан токтотулган жүк ташуучу унаалар аткезчиликке тиешеси жок деп билдирет.
«3 фура тең тажиктерге тиешелүү болгон. Анын ичинде Россиядан келе жаткан эски буюмдар, муздаткыч, бочка, плинтус жана ушуга окшогон эски буюмдар экен» -деди Юсупова.
