Пакистандын Исламабад шаарында Чыңгыз Айтматовдун «Жамийла», «Кош бол, Гүлсары» жана » Деңиз бойлой жорткон ала дөбөт » чыгармаларын камтыган китептин бет ачары болду. Бул тууралуу Тышкы иштер министрлиги билдирди.
Маалыматка ылайык, китеп урду тилинде басылып чыккан. Демилгени КРнын Пакистандагы элчилиги көтөргөн.
Элчи Эрик Бейшембиев бул бет ачар эгемендүүлүктүн 30 жылдыгына карата уюштурулганын белгилеп, мамлекеттүүлүктүн өнүгүшүнүн негизги этаптары, Айтматовдун өмүр жолу, анын чыгармалары 176 тилге которулганы жөнүндө айтып берди.
Иш-чарага жазуучулар, илимпоздор, дипломатиялык корпустун жана жалпыга маалымдоо каражаттарынын өкүлдөрү катышты.
Белгилей кетсек, иш-чарада Айтматов жөнүндө документалдык тасма, сүрөт көргөзмөсү, стенддер жана туристтик буклеттер жана кыргыз ырларынын аткарылышы уюштурулду.
