Аскер Тажикстанга тамеки алып өтүп бара жаткан жаранга эскертүүчү ок чыгарууга аргасыз болду. Бул тууралуу УКМКнын Чек ара кызматынын басма сөз кызматы билдирди.
Маалыматка ылайык, окуя Баткен районунун Ганжак аймагындагы чек арада болгон. КИАнын айдоочусу токтотуу талабын этибарга албай, чек араны көздөй айдап жөнөгөн. Натыйжада, чек арачы асманга эскертүүчү ок чыгарууга аргасыз болгон. Ошондо гана айдоочу токтогон.
Кармалган 31 жаштагы Т.у.О., Кыргызстандан Тажикстанга 1,5 миң килограмм кургатылган тамекини алып кетип бара жаткан. Тиешелүү документтер катталгандан кийин кармалган адам жана жүк компетенттүү органдардын кызматкерлерине кошумча иликтөө үчүн өткөрүлүп берилди.
