Кыргыз Республикасынын Эл артисти, “Кыз бурак” тобунун негиздөөчүсү Гүлшайыр Садыбакасова «Эркин уулум, сенин туулган күнүңдү, унутканым жок! Сен менин жүрөгүмдө уюган алтынымсың», — деп уулун эскерди.

“Бүгүн Эркинтайымдын туулган күнү. «Апам менин туулган күнүмдү унутуп калган окшойт», — дедиңби каралдым. Сенин туулган күнүңдү эч качан унутпагандай эле, бүгүн да унуткан жокмун. Мен, жылдагыдай эле Бишкекте маданият күнү майрамына катышып азыр гана колум бошоду балам. Мен Бишкекке жөнөгөнүмдө, «Туулган күнүмдү дагы сиз жок өткөрөмүнбү», — деп таарынып калчусуң. Сени унутпай калайын балапаным! Сен, унута турган бала эмессиң Экошам! Сен менин көкүрөгүмдө түбөлүк уюган алтынымсың! Сен менин ойлорумда өмүр боюу жашаган жаркынымсың, сен мени балалыгың, өспүрүм кезиң, жигит курагың менен бакытка бөлөгөн периштемсиң. Сен менин жетпей калган, таппай калган үмүтүмсүң! Сен менин бүтпөгөн, түгөнбөгөн күйүтүмсүң! Туулган күнүң менен уулум!» — деп жазды Гүлшайыр Садыбакасова инстаграм баракчасына.

Эске салсак, Гүлшайыр Садыбакасованын уулу Эркин 2020-жылы 28-августта 18 жашында каза болгон.