Кыргыз-тажик чек арасында кырдаал туруктуу. Бул тууралуу УКМКнын Чек ара кызматынын басма сөз кызматы кабарлады.
Маалыматка ылайык, кечээ, 1-декабрда саат 23:30да Баткен районунун Төрт-Көчө жергесинде Кыргызстан менен Тажикстандын чек арага жакын райондорунун акимдери, укук коргоо жана компетенттүү органдардын өкүлдөрүнүн катышуусунда чек ара өкүлдөрүнүн жолугушуусу болду.
Жолугушууда Баткен облусунун Дахме жергесиндеги мамлекеттик чек арага жакын жерде белгисиз адамдар Тажикстан тараптан 7-8 ирет ок чыгаргандыгы тууралуу сөз болду.
Жолугушуунун жыйынтыгында коомдук тартипти жана мыйзамдуулукту камсыз кылуу максатында тараптардын укук коргоо органдары 2-декабрдан тартып чек ара аймагында биргелешкен күзөт иштерин жүргүзүү чечими кабыл алынды.
Эки тараптын чек ара бөлүктөрү күзөт иштерин күн сайын өткөрүп турат. Учурда кыргыз-тажик чек арасындагы кырдаал туруктуу.
