Бүгүн, 12-март күнү саат 08:30 чамасында Бишкек-Нарын-Торугарт жолунун 153,8-чакырымында жол кырсыгы катталды. Бул тууралуу ИИМдин жол кыймылынын коопсуздугун камсыздоо башкармалыгынан билдиришти.
Маалыматка караганда, Балыкчы шаарынын 67 жаштагы тургуну Мерседес-Бенц унаасы менен чыгыштан батышка бара жатып, жол кырсыгына кабылган. Күбөлөрдүн айтымында, айдоочу жогорку ылдамдыкта жолдун кайрылышынан унаанын рулуна ээ боло албай оодарылып кеткен.
Жол кырсыгынын кесепетинен унаанын айдоочусу, 69 жана 68 жаштагы жүргүнчүлөрү Балыкчы шаардык ооруканага жеткирилген. Ал эми 61 жаштагы аял киши алган жаракатынан улам окуя болгон жерде каза болгон. Бардыгы Балыкчы шаарынын тургундары. Унаа айып аянтчасына жеткирилип, тийиштүү экспертизалар дайындалып, тергөө иштери жүрүүдө.
