Опузалап пара алуу фактысы боюнча Кыргызстандын жараны жана Сузак районунун Таш-Булак айыл аймагынын кызматкери кармалды. Бул тууралуу УКМКдан билдиришти.
Маалыматка караганда, 11-мартта УКМК тарабынан Кылмыш-жаза кодексинин 343-беренесинин 1-бөлүмү (опузалап пара алуу) менен козголгон кылмыш ишинин алкагында, жеке ишкерден 90 миң сом акча каражатын алып жаткан жеринен Кыргыз Республикасынын жараны жана Сузак районунун Таш-Булак айыл аймагынын кызматкери кармалды.
Ал УКМКнын төрагасы Камчыбек Ташиевдин өкүл баласы болуп туруп, үй-бүлөлүк мамиленин артына жашынып, кармалган жаран менен сүйлөшүү жолуу аркылуу жеке ишкерден коркутуу жолу менен 120 миң сом өлчөмүндө акча каражатын талап кылганы аныкталган.
Кармалган жарандар Жалал-Абад ШИИБдин убактылуу кармоочу жайына киргизилди. Азыркы учурда кылмыш ишинин алкагында тиешелүү тергөө амалдары жүрүүдө.
