China Eastern Boeing 737 жүргүнчү учагы Кытайдын түштүгүндө кыйроого учурады. Бул тууралуу 21-мартта Кытайдын борбордук телеканалы билдирди.
«Кытайдын Гуанси-Чжуанск автономиялуу районуна караштуу Учжоу шаарынын Тэн округунда 133 жүргүнчүсү бар China Eastern Airlines авиакомпаниясынын Boeing 737 жүргүнчү учагы кулап түшкөн»,- деп айтылат маалыматта.
Flightradar24 агенттигинин маалыматына караганда, MU5735 рейсиндеги учак Куньминден жергиликтүү убакыт боюнча 13:15те учуп, Гуанчжоуга багыт алган. Учжоу аймагында саат 14:20 чамасында учак ылдамдыгын кескин азайтып, бийиктигин жогото баштаган, андан кийин радар экранынан көрүнбөй калган. Курман болгондордун саны белгисиз. Кырсык болгон жерде издөө-куткаруу иштери уланууда. Ошондой эле маалымат каражаттары учак кулаган жердеги токойдо өрт чыкканын жазып чыгышты.
