Жалал-Абад шаарында каракчылыкка шектелип уюшкан кылмыштуу топтун мүчөсү кармалды. Бул тууралуу Жалал-Абад ОИИБден билдиришти.
Маалыматка караганда, 23-мартта милицияга 31 жаштагы шаар тургуну арыз менен кайрылган. Ал өзүнүн арызында Жалал-Абад шаарынын аймагында сырттан тааныш болгон Дастан аттуу бала “көчө баласымын” деп коркутуп, 20 миң сом акчасын алып койгондугун билдирген. Аталган факты боюнча Кылмыш-жаза кодексинин 206-беренеси (тоноо) менен кылмыш иши козголгон.
Жүргүзүлгөн ыкчам иликтөө иштеринин натыйжасында жогорудагы кылмышка шектелип, ИИМде Камчы Көлбаевдин уюшкан кылмыштуу тобунун мүчөсү катары каттоодо турган, “Чаян” каймана аты бар Жалал-Абад шаарынын 28 жаштагы тургуну кармалган. Шектүүнүн Жалал-Абад облусунун аймагында катталып, бети ачылбай жаткан оор жана өзгөчө оор кылмыштарга тиешеси бар же жоктугун аныктоо максатында тийиштүү иш-чаралар жүргүзүлүп жатат. Тергөө амалдары уланууда.
