Кечээ, 4-май күнү нөшөрлөп жааган жаандын кесепетинен улам Сузак районунун Барпы жана Атабеков айыл өкмөтүндөгү 606 турак үйдү, 10 социалдык объектини сел каптаган. Бул тууралуу ӨКМдин басма сөз кызматы билдирди.
«Учурда Өзгөчө кырдаалдар министринин орун басары жетектеген ыкчам топ жеринде тактоо иштерин жүргүзүп, Сузак районуна өзгөчө кырдаал режими киргизилди.
Жарандык коргонуу кызматынан 260 жаран, өздүк курамдан 135 куткаруучу тартылып, сел каптаган турак үйлөрдө чогулган сел сууларын мотопомпанын жардамы менен тазалоодо»,-деп берилет билдирүүдө.
Ошондой эле, ӨКМден 12 бирдик техника, Жарандык коргонуу кызматынан 30 техника тартылып, күйүүчү май менен камсыздалган.
Учурда ыкчам штаб түзүлүп, кырдаалды жөнгө салуу жумуштары жүрүүдө.
