Мурдагы Башкы прокурор Аида Салянова Президент Садыр Жапаров тууралуу өз пикирин билдирип, анын мамлекеттик кызыкчылыкты жеке мамилелерден жогору койгон кадамын жогору баалады.
Салянова белгилегендей, ал Башкы прокурор болуп турган учурда азыркы мамлекет башчысы кылмыш жоопкерчилигине тартылган. Ошондуктан жылдар өткөндөн кийин кандайдыр бир мамлекеттик кызматка талапкер болгондо Президент тарабынан колдоо болоруна өзү да ишене алган эмес.
“Мен өз позициямдан эч качан тайган эмесмин. Ошентсе да Президент эски таарынычтарды эстебей, мамлекеттин кызыкчылыгын жогору коюп, мени колдоду. Муну мен саясий маданияттын жана мамлекеттик ой жүгүртүүнүн жаңы деңгээли катары баалайм”,-деген ал.
Мурдагы Башкы прокурордун айтымында, бул кадам өлкөдө жаңы саясий маданиятты калыптандырууга, коомду бириктирүүгө жана мамлекеттин келечеги үчүн иштөөгө багытталган мамиленин көрүнүшү болуп саналат.
Салянова ошондой эле Президент көрсөткөн ишенимди өлкө жана келечек муун алдындагы чоң жоопкерчилик катары кабыл аларын белгиледи.
