Саламаттыкты сактоо министри Алымкадыр Бейшеналиев депутат Жусупбек Коргонбай уулун сотко берди. Бул тууралуу анын жактоочусу Кайсын Абакиров билдирди.
Саламаттык сактоо министри ар намысын жана кызматтык репутациясын коргоп берүүнү суранып Ленин райондук сотуна кайрылган. Ал материалдык жана моралдык зыянга 10 миң сом сурады.
Буга чейин Коргонбай уулу ЖКнын жыйынында аны уюшкан кылмыштуу топко тиешеси бар деп айыптаган.
“Черный хирург” деген каймана аты бар экен. Кримтөбөл Рысбек Акматбаевди жана башка кылмыштуу топтун мүчөлөрүн жашыруун операция кылып жүргөн. Бул министр болуп келгенден бери эле ооруканаларда эне-балдар өлүп жатат. Кадрдык башаламандык болууда”, — деген эл өкүлү.
Бейшеналиев муну четке кагып, ал сунуштаган адамды кызматка дайындабай койгондуктан өч алып жатканын айткан.
