Башкы балдар хирургу, №3 балдар ооруканасынын мурунку башкы дарыгери Талант Өмүрбеков эки тараптуу пневмония илдетинен улам реанимацияга түштү. Бул маалыматты Республикалык жугуштуу оорулар ооруканасынын башкы дарыгери Гүлжигит Аалиев тастыктаган.
Анын айтымында, Өмүрбеков аларга кечээ пневмония илдети менен оор абалда түшкөн.
«Азыр абалы турукташты, бирок дагы эле абалы оор бойдон калууда. Өмүрбеков жогорку агымдагы кычкылтек менен реанимацияда жатат. Мындай оорулардын божомолу жөнүндө айтуу кыйын», — деди Аалиев.
Ал кошумчалагандай, Өмүрбековго бардык керектүү медициналык жардамдар көрсөтүлүп жатат.
