21-апрелде Баткен шаарында “BATKEN 4.0: Аймакты ѳнүктүрүү үчүн санариптик чечимдер” аталышында стартап-хакатондун финалдык беттеши болуп өттү. Иш ара 18-марттан 21-апрелге чейин уланып, Жалпысынан 90 катышуучу катышты. Жыйынтыгында финалга 15 команда чыгып, өз идеяларын жана санариптик чечимдерин сунушташты.
Хакатондун негизги максаты — жаштардын инновациялык демилгелерин колдоо аркылуу Баткен жергесинин өнүгүшүнө салым кошуу болуп саналат. Иш-чара инновациялык технологиялар менен аймактык маселелерди чечүүгө багытталган.
Программа алкагында катышуучулар бизнес-идеяны түзүүдөн тартып, минималдуу даяр продуктуну иштеп чыгууга чейинки этаптарды өтүштү. Ошондой эле менторлор менен иштеп, өз долбоорлорун жакшыртууга мүмкүнчүлүк алышты.
Иш-чара И.Раззаков атындагы Кыргыз мамлекеттик техникалык университети менен Баткен мамлекеттик университети тарабынан Германия эл аралык кызматташтык уюму, Кыргыз Республикасынын Министрлер Кабинетине караштуу Интеллектуалдык менчик жана инновациялар боюнча мамлекеттик агенттиги жана Эл аралык электробайланыш союзунуну колдоосунда өткөрүлдү.
