Ташкенттин Үчтепа районунда бир үй-бүлөдөн беш киши эс-учун жоготкон абалда табылган. Алардын үчөө каза болгон. Бул тууралуу Өзбекстандын Башкы прокуратурасы билдиргенин чет элдик ЖМКлар жазышууда.
Окуя 16-январь күнү кечке жуук болгон. Тергөө тобу окуя болгон жерде 36 жаштагы эне менен 3 жаштагы кыз каза болгонун аныкташкан. Бир суткадан кийин медициналык тез жардам көрсөтүлгөнүнө карабай, үй-бүлөнүн 39 жаштагы мүчөсү көз жумган.
«12 жаштагы жана 8 айлык эки кыз жандандыруу бөлүмүнө жаткырылды. Окуя болгон жерден ар кандай дары-дармектер, ошондой эле үй-бүлө жеген тамак-аштар алынды. Азыр экспертиза дайындалды. Так корутунду чыккандан кийин үй-бүлө мүчөлөрү эмне себептен каза болгону белгилүү болот»,- деп берилет маалыматта.
Учурда тергөө амалдары жүрүп жатат.
