Бишкек шаарында жол тыгынын азайтуу жана транспорт агымын натыйжалуу башкаруу максатында Чүй проспектиси менен Ибраимов көчөсүнүн кесилишине жаңы үлгүдөгү жол чырактар орнотулуп, пилоттук негизде ишке киргизилди. Бул тууралуу мэрия билдирди.
Маалым болгондой, долбоордун алкагында жаңы жол чырактардын иштөө алгоритми, алардын унаа агымына тийгизген таасири жана жол кыймылын уюштуруудагы өзгөрүүлөр талдоого алынат.
Ошондой эле жаңы система боюнча үзгүлтүксүз мониторинг жүргүзүлүп, анын жыйынтыгына жараша борбор калаада жол кыймылын жакшыртуу боюнча мындан аркы чечимдер кабыл алынары белгиленди.
Мындан тышкары, Бишкек шаарынын мэриясы гранттык негизде жол чырактарды орнотууну ишке ашырган Vokko компаниясына шаар инфраструктурасын өнүктүрүүгө кошкон салымы үчүн ыраазычылык кат тапшырды.
