30-ноябрдан бери Бишкек шаарында “Көпөлөк” аттуу профилактикалык иш-чара өтүүдө. Бул тууралуу Бишкек ШИИББден билдиришти.
Маалыматка ылайык, алгачкы үч күндө борбор калаанын милиция кызматкерлери болжолдуу түрдө интимдик кызмат көрсөткөн кыздар иштей турган сауна, мейманкана жана ижарага алынган батирлерди текшеришти. Аткарылган иштердин жүрүшүндө милиция 250дөн ашык кызды аныктады, алардын ичинен 8 жашы жете элек. Аларга 10 кылмыш иши козголгон жана 2 кылмыш иши боюнча шектүүлөр Бишкек ШИИББнын убактылуу кармоочу жайына киргизилген.
Мындан тышкары, укук бузууларды жасагандыгы үчүн 11 кыз соттун чечими менен Кыргыз Республикасынын Укук бузуулар кодексинин беренелерине ылайык административдик жоопкерчиликке тартылып, Бишкек ШИИББнын атайын кабыл алуучу жайына киргизилди.
Бүгүнкү күндө козголгон кылмыш иштеринин алкагында милиция кызматкерлери тарабынан тиешелүү тергөө амалдары жүргүзүлүүдө. Анын жүрүшүндө 60тан ашык сауна, массаж бөлмөлөрү, мейманканалар аныкталып, администраторлор жана ээлери суракка чакырылып, кылмыш жоопкерчилиги эскертилген. Ошондой эле, ар кандай мессенджерлерде мурда түзүлгөн топтор жана жамааттардын катышуучулары социалдык жоопкерчилиги төмөн кыздар экени аныкталган.
Посмотреть эту публикацию в Instagram
