Бишкекте «Ынтымак» паркынын жанында кыздардын тобу кайгуул кызматкерлерине кол салган. Бул тууралуу Милициянын кайгуул кызматынын басма сөз кызматы билдирди.
Маалыматка ылайык, 28-май күнү Ч.Айтматов жана А.Масалиев көчөлөрүнүн кесилишинде жол чырак иштебей, жеринде унаа кыймылын кайгуул кызматкерлери жөнгө салып жаткан.
Айдоочулар кайгуул кызматкерлерине унаа кыймылына тоскоолдук жараткан кайырчыларды жолдон алууну өтүнүшкөн.
Бирок, кайырчылык менен алектенген кыздар аларды укпай, кызматкерлерге кол салып, ур-тепкиге алышкан.
«Кыздар күч колдонбостон Октябрь райондук ички иштер башкармалыгына жеткирилди. Аталган кыздар кайгуул кызматкерлеринин мыйзамдуу талаптарына баш ийбегендиги үчүн протокол толтурулду», — деп берилет билдирүүдө.
