Чүйдө №8 абактагы 45 жаранга паспорт берилди. Бул тууралуу Жаза аткаруу кызматынан билдиришти.
Маалыматка ылайык, паспорттоштуруу соттолгондорду түзөтүү жана кайра социалдаштыруу боюнча жүргүзүлгөн иштердин алкагында №8 түзөтүү мекемесинин администрациясы жана Москва районунун калкты тейлөө борбору тарабынан ишке ашырылды.
Ведомстводон белгилешкендей, жакын арада №8 түзөтүү мекемесинде жаза өтөп жаткан дагы 50гө жакын соттолгон жаранга паспорт берүү жана тариздөө иштери күтүлүүдө.
Кошумчалай кетсек, 2023-жылдын башынан бери түзөтүү мекемелеринин социалдык кызматкерлери 367 соттолгон адамды паспорт менен камсыз кылууга жетишкен.
