Чүй облусунун Сокулук районунда үч уй уурдаганга шектелгендер кармалды. Бул тууралуу Чүй ОИИБинин басма сөз кызматынан билдиришти.

Маалыматка ылайык, Сокулук РИИБине 55 жаштагы О.А. аттуу Дача-Суу айылынын тургуну арыз менен кайрылган. Анда 21-ноябрга караган түнү сарайдан ар кандай түстөгү үч уйду белгисиз адамдар уурдап, из жашырып качып кеткен. Келтирилген чыгымдын көлөмү 240 миң сомду түзгөн.

«Бул факт кылмыштардын жана жоруктардын бирдиктүү реестерине кылмыш-жаза кодексинин 200-беренеси (уурдоо) боюнча катталып, сотко чейинки өндүрүш башталган.

Жүргүзүлгөн тергөө-оперативдик иш-чаралардын алкагында милиция кызматкерлери тарабынан бул кылмышка шектүү делип, 27 жаштагы Р.Р. жана В.А.аттуу Чүй облусунун тургундары кармалган. Сотко чейинки процесстин жүрүшүндө, жогоруда аталган адамдар Чүй облусунун Сокулук жана Аламүдүн райондорунун аймагында жасалган мал уурулуктун дагы үч фактысы боюнча тергөө иш-чаралары жүргүзүлүп жаткандыгын мойнуна алышты. Кармалгандар убактылуу кармоочу жайга киргизилди»,- деп жазылат маалыматта.

Учурда аталган кылмышка шектүүлөрдүн ушул сыяктуу башка фактыларына катыштыгы бар-жогу текшерилүүдө.