Эгер мамлекет тарабынан жөнгө салуу чаралары көрүлбөсө, Кыргызстанда күйүүчү майдын баасы кыйла жогоруламак. Бул тууралуу Министрлер кабинетинин төрагасынын биринчи орун басары Данияр Амангелдиев «Азаттыкка» берген маегинде билдирди.

Анын айтымында, мындай учурда АИ-95 бензининин баасы 120 сомго, АИ-92 бензини 114 сомго, ал эми дизель майы 148- 150 сомго чейин көтөрүлүшү мүмкүн болмок.

Министр күйүүчү майдын кымбатташы жана тартыштыгы негизинен геосаясий кырдаалга жана Орусиядагы мунай иштетүүчү заводдордун ишине байланыштуу экенин белгиледи. Орусия ички рыногун камсыздоо үчүн күйүүчү май экспортун убактылуу чектеген.

Өкмөт бааларды турукташтыруу жана тартыштыктын алдын алуу үчүн чараларды көрүп жатканын билдирүүдө. Учурда Кыргызстан күйүүчү май жеткирүүнүн альтернативдүү багыттарын карап, Беларустан жана Кытайдан импорттоону баштады. Ошондой эле Өзбекстан жана Казакстан менен сүйлөшүүлөр жүрүп жатат.

Данияр Амангелдиевдин маалыматына ылайык, өлкөдөгү күйүүчү майдын запасы буга чейин 2-3 жумага жетсе, азыр бул көлөм бир жарым айга чейин көбөйтүлдү. Өкмөт минималдуу запасты 2,5 айга жеткирүүнү көздөөдө.