Талас облусунун Бакай-Атада 2 жашар бала жоголуп, дарыяга түшүп кетиши мүмкүн экени айтылууда. Бул тууралуу Талас ИИБнин басма сөз кызматы билдирди.
Анын айтымында, 12-апрелде полиция бөлүмүнүн нөөмөт бөлүмүнө Өзгөрүш айылынын тургунунан 2019-жылы туулган Рамзан Айткулов саат 15:30 чамасында жоголгону тууралуу маалымат келип түшкөн.
Окуя болгон жерге барган ыкчам-тергөө тобу баланын энеси менен чоң энеси короодогу буюмдарды жууп, ал алардын жанында ойноп жүргөнүн аныкташкан. Бирок бир аз убакыттан кийин алар Рамзанды таппай калышып, издей башташкан.
Баланы издөөгө 80ден ашуун полиция кызматкерлери, ӨКМдин алты кызматкери жана жергиликтүү тургундар тартылды.
Өзгөчө кырдаалдар министрлигинин басма сөз кызматы билдиргендей, 12-апрелде Өзгөрүш айылынын тургундары бала Талас дарыясына түшүп кетиши мүмкүн экендиги жөнүндө маалымат алышкан. Түнкүсүн издөө иштери убактылуу токтотулуп, бүгүн, 13-апрелде издөө иштери кайрадан улантылууда.
