Америкалык Брендан Эванс 2017-жылы питбуль-терьер күчүгүн мыкаачылык менен өлтүргөн деген айып менен 10 жылга эркинен ажыратылганын жергиликтүү South Florida Sun Sentinel гезити жактоочуга таянуу менен билдирди.
Олли аттуу майып күчүк 2017-жылы октябрда Голливудда табылган, кол салган киши итти чемоданга салып таштап кеткен. Олли 50дөн ашык бычактан жаракат алган жана ветеринардык клиникага жеткирилип, эки күндөн кийин каза болгон. Бул окуяга кыжырданган жарандар кылмышкерди кармагандарга 60 миң доллар сыйлык жарыялашкан. Кийинчерээк полиция Эвансты чемодандагы ДНК издеринен тапкан.
Эванстын батирин тинтүү учурунда жуунучу бөлмө менен ашканадан мышыктардын тамандары, келемиштердин өлүктөрү жана кандын издери, ошондой эле эки бычак жана союл табылган. Алгач адам күнөөсүн мойнуна алган эмес, төрт жылдан кийин гана мойнуна алган.
